Përgjigjja:

Lejohet për gratë, të përdorin medikamentet kur shkojnë në Umre, ashtu që menstruacioni të mos bëhet pengesë për kryerjen e Umres.

Ajo çka duhet të themi: “Nuk duhet përdorimi i medikamenteve të cilat shkaktojnë ndonjë dëm”. Mirëpo ne themi: “Me kushtin që të mos dëmtohet në të ardhmen”, siç ka thënë Pejgamberi a.s. “As mos dëmtoni dhe as mos u dëmtoni”. Njeriu nuk duhet ta dëmtojë veten e vet dhe të mos e dëmtojë tjetrin. Për këtë arsye duhet që për këtë çështje të konsultohet me mjekun, e të ngjashme.

Nëse nuk e merr atë veprim, dhe hyn në ciklin mujor (menstruacion), çështja është se nëse i vijnë menstruacionet pasi e ka bërë nijetin për Umre, dhe ka hyrë në Ihram për Umre, duhet të presë sa t’i përfundojë menstruacioni, e pastaj e kryen Umren. Kështu veprohet nëse ka hapësirë për të kryer Haxhin Temettu, në të kundërtën hyn në Umre të Haxhit dhe e kryen Haxhin Kiran (Umre dhe Haxh në të njëjtin Ihram). Pra, nëse ka mundësi para ditës së nëntë e kryen Umren, dhe llogaritet Haxh Temettu.

Përderisa, nëse nuk ka mundësi para ditës së nëntë, atëherë kalon në Haxh Kiran dhe thotë (e bën nijetin): “Zoti im, hyra në Ihram për Ty, për ta kryer Haxhin dhe Umren në të njëjtin Ihram”. Në këtë gjendje, i njëjti veprim vlen edhe për Haxhin edhe për Umren.

Nëse supozojmë se i vonohet menstruacioni edhe më shumë dhe nuk e kryen Tavafin Thelbësor, dhe pret ditën e parë të Bajramit të Kurbanit, ditën e dytë, ditën e tretë, e edhe më shumë, ndërsa ajo është e varur me Agjencinë e Haxhit të saj e cila i ka orët e numëruara, dhe ajo nuk mund të ndahet nga grupi i saj, po ashtu edhe mund t’i ikë fluturimi i aeroplanit, atëherë i lejohet asaj ta kryejë Tavafin me menstruacion. Kjo pasi të jetë e siguruar. Pra nuk bën mëkat.

–

Dr. Musli Vërbani

Shkëputur nga “Më është parashtruar pyetja, po e jap përgjijgen”