Shkaqet e mospranimit të lutjes

–

Ibrahim ibn Ed’hemi kalonte nëpër tregun e Basrës.

U tubuan njerëzit rreth tij dhe i thanë:

– Çka është me ne që i lutemi Allahut, por ai nuk na pranon?

Ai i thotë: – Për shkak se zemrat e juaja janë të vdekura në dhjetë çështje:

E para:

E njihni Allahun dhe nuk i kryeni obligimet e Tij.

E dyta:

Deklaroni se e doni të Dërguarin e Allahut e nuk veproni sipas sunetit të tij.

E treta:

E lexoni Kur’anin dhe nuk veproni me të.

E katërta:

I shfrytëzoni të mirat e Allahut, e nuk e falënderoni.

E pesta:

Thoni se shejtani është armiku juaj, e nuk e kundërshtoni.

E gjashta:

Thoni se xheneti është i vërtetë, e nuk punoni për të.

E shtata:

Thoni se xhehenemi është i vërtetë, e nuk largoheni prej tij.

E teta:

Thoni se vdekja është e pashmangshme, e nuk përgatiteni për çastin e tij.

E nënta:

Zgjoheni nga gjumi, i shihni të metat e të tjerëve, e i harroni tuajat.

E dhjeta:

I varrosni të vdekurit, e nuk llogaritni se do t’ju ndodhë njësoj si atyre.

–

Dr. Musli Vërbani

“365 tregime për fëmijën tuaj brenda 12 muajve të vitit”