Dr. Musli Vërbani

–

Fitrat jepen pas Ramazanit dhe para Faljes së Bajramit, e ajo kohë është distanca kohore prej faljes së Sabahut e deri në faljen e namazit të Bajramit. Pra, (përafërsisht) prej orës 5:50 min. e deri në 6:41 min. kur fillon falja e Bajramit, ndërsa pasi të falet Bajrami nuk pranohen fitrat.

Po pse atëherë ne i japim fitrat gjatë Ramazanit!?

Kemi dy lloje të të drejtave:

• Të drejtën ndaj Zotit
• Të drejtën ndaj njeriut

E drejta ndaj Zotit nuk mund të kryhet para kohe si p.sh.: Nëse e fal namazin e Drekës para kohës së Drekës, namazi nuk pranohet.

E drejta ndaj njeriut mundet të kryhet edhe para kohe, që në këtë rast ne e kryejmë para kohe me qëllim që fitrat të arrijnë te njeriu edhe para kohës së dhënies së fitrave.

Pra, dijetarët kanë bërë lehtësim vetëm nga shkaku se është e drejtë e njeriut, edhe pse ajeti kur’anor thotë: “Ka shpëtuar ai i cili e ka dhënë Zekatin (e fitrit) e pastaj e përmend Zotin e vet dhe e fal (namazin e Bajramit)”. (El-A’la)