Dr. Musli Vërbani

Shkëputur nga "Besimi në melekët"

Melekët e autorizuara për ta vizituar dhe kontrolluar tokën

 

Zoti i Madhëruar ka krijuar melek për ta vizituar tokën dhe për t’i kërkuar vendtubimet në të cilat përkujtohet Allahu.

Vendtubimet e përkujtimit të Allahut janë:

Vendtubimet e këndimit të Kur’anit dhe mësimit të tij, e mësimit të haditheve të Muhamedit a.s., vendtubimet e mësimit të hallallit dhe haramit, vendtubimet e tesbihut dhe istigfarit, vendtubimet e diturisë së dobishme.

Ebu Hurejra thotë:

Ka thënë Muhamedi a.s.: “Vërtetë Zoti i Madhëruar dërgon melek në tokë për të kontrolluar rrugët dhe për t’i kërkuar ata të cilët e përkujtojnë Allahun. Kur  të takojnë popullin i cili e përkujton Allahun. (U thuhet): “Kërkoni çka ju nevojitet”, dhe i mbulojnë me krahët e tyre në qiell.

Zoti i Madhëruar e di por prapë i pyet melekët:

–     Çka thonë robërit e mi?

Subhanallah, Elhamdulilah, Allahu ekber.

–     A më kanë parë?

Jo për Zotin nuk të kanë parë.

–     Po si do të vepronin nëse më shohin?

Sikur të të shohin do të të adhuronin më shumë, do të të falënderonin më shumë dhe do të të lavdëronin më shumë.

Pastaj Zoti i Madhëruar i pyet melekët:

–     Çka kërkojnë prej Meje?

Kërkojnë Xhenetin.

–     A e kanë parë atë?

Jo, për Zotin nuk e kanë parë.

–     Po sikur ta shihnin?

Sikur ta kishin parë do ta lakmonin më shumë, do ta dëshironin më shumë dhe do ta kërkonin më shumë.

Pastaj Zoti i Madhëruar prapë pyet melekët:

–     Prej çka kërkojnë mbrojtje? Nga zjarrit (Xhehenemit).

–     A e kanë parë atë?

Jo për Zotin nuk e kanë parë.

–     Po sikur ta shihnin.

Sikur ta kishin parë do të frikoheshin më shumë prej tij dhe do të largoheshin nga rruga e cila të shpie atje.

Zoti në fund thotë: “Dëshmoj para juve se ia kam falur atyre gabimin”.

Njëra nga melekët thotë: Në mesin e tyre është një njeri i cili ka ardhur për nevojë tjetër.

Zoti i Madhëruar thotë: “Ata janë një popull dhe të gjithë janë për një kuvendim”.

Nga ky hadith kuptojmë se Zoti i Madhëruar i do ata të cilët e përkujtojnë Atë, njëherit ata kanë vlerë të madhe te Zoti i Madhëruar.

Po ashtu ata të cilët e përkujtojnë Zotin i duan edhe melekët.